4招分辨網店產品真與偽

隨著社交網絡發展，各類平台都相繼冒起形形式式既網店，亦都越嚟越多人中意網上購物
點解？網上購物足不出戶，只需要簡單click幾下，心儀貨品就可以送到家門口，唔使下下出街同自由行逼
而所謂樹大有枯枝，好多不法之徒就趁呢股風氣去呃廣大消費者
作為網購愛好者既小篇實在睇唔過眼，喺呢度分享小小見解，用4招去分辨網店產品真偽，希望各位唔好墮入呢類騙局！

第一招：認清商品

唔知各位平時掃Facebook會唔會見到好多商品廣告，成篇嘢淨係得幾個重點：功能強勁，價錢超級平，服務一流，限時優惠
但往往，商品牌子就經常"若隱若現"，例如下圖數碼相機，圖片外觀&型號都同SONY既DSC-RX100一樣，唯獨冇清楚標明係SONY
點解？相信大家都好清楚，欲蓋彌彰，等你收到假貨都投訴無門！

---

望真啲，張圖明明係SONY，型號都一樣，冇假啦掛？

---

但根據網友經驗，收到既實物同配圖完全唔同！ 上淘寶Check翻，原嚟係一部價值$120既雜牌數碼相機， 但係該網店聲稱佢哋冇講過售賣既係SONY， 又真係吹佢唔漲...

---

第二招：仔細格價

SONY DSC-RX100喺price.com既行貨價錢最低都要$3950，而呢間網店竟然做緊$749，做緊1.9折，咁大隻蛤乸隨街跳？
Ummm，可能係倉底貨先咁平呢
另外，下圖法國牌子Côte&Ciel Nile Backpack，官網正價約$2300，見到有廣告竟然賣$359，做緊1.5折，你又信唔信？
當然，唔排除有啲商品會做Promotion或者想散貨而減價，但正常品牌商或代理商絕對唔會用呢啲賤價去促銷做壞市
用1折買到既係行貨定係水貨，定係學馬雲話齋係"高仿貨"？相信大家心裡有數

---

其實小編認為某些仿製品並冇問題，但呢間網店開宗明義係Côte&Ciel Nile Backpack，賣到咁平，絕對有理由懷疑係"高仿產品"

---

網站入面原價竟然係$849，小編都好想知佢哋既貨源喺邊

---

而呢個係官方網站既價錢:: US$295，網址係https://www.coteetciel.com/en-HK/nile-backpack-obsidian-laptop-bag

---

第三招：分辨網站真偽

大家喺Facebook見到正常既網店都會有網頁版支持，可以透過網上付款直接購物(如Paypal，信用卡等)，而透過第三方網上支付工具對消費者而言會較有保證，但並非所有網站都可以透過該等途徑進行網上付款。
而小編見到好多假網店，美其名係"貨到付款"，好似好安全，但說穿了，可能只係無法透過網上支付！
而實際上既貨到付款，一般快遞人員需要收取現金後先會俾顧客開箱驗貨，當顧客付款後先發現係假貨，快遞人員並不會受理，顧客需要再聯絡網店客服安排換貨，但客服會唔會受理又係另一回事。
再者，當你細心睇下佢哋既網站，Bug真係多到數唔曬！

1) 網店名 同 網址係完全冇聯繫！網店名係ABC Online Shop，但網址就係www . DEF . com
到底係ABC定DEF？佢係玩緊自己品牌定係玩緊消費者？媽呀我好亂．．．

2) 佢哋一般會有個倒數計時器，根據小編觀察，長期都係倒數9粒幾鐘
第二日再睇，都仲係9粒幾鐘
原理同2012世界末日倒數一樣，倒到依家都未末日
小編相信到真係世界末日佢哋都限時優惠

3) 大大隻字寫住話已售出9999件，恭喜你，你將會成為佢哋第10000位顧客！
咦，等等，佢價錢下面明明寫住限售150件，售完即止
睇嚟店主數口都幾精．．．

​4) 成個網站淨係會售賣一款產品，冇主頁，冇其他分頁，冇關於該網店既資料，冇付款及送貨須知資料，咩都冇，對呢件產品有興趣就買，冇興趣就可以過主
而且小編最近先發現，第二日再上同一網站又會賤價賣另一樣"高仿"品牌產品

​仲有好多關於網頁既例子就唔一一詳述啦，大家如果得閒見到可以click入去睇下，其實都會發現好多笑料架～

---

第四招：分析Facebook專頁及帖子

喺呢個咩人都可以開專頁既時代，開間Facebook網店實在易過借火，而大家去定義某間網店信唔信得過，又會用咩準則呢？
可能好多人會取決於Like Page既人數
但唔怕同你講，其實好多網店都有"買Like"既嫌疑
砌生豬肉？非也，其實只要用Facebook Page既免費分析工具(如Socialbakers)分析一下讚好人主要嚟自邊度就得
如果一間香港網店，但有一半以上讚好人數係嚟自埃及，菲律賓等其他國家
Ummm... 咁都真係做得幾國際化！

都可以參考翻之前香港01做既報導：
https://www.hk01.com/01偵查-網上舖疑賣高仿波鞋-百度求賣假攻略-埃及-買Like

而關於貼文，好多時見到呢類廣告貼文都有幾多Like，有時仲會見到幾個"嬲嬲"
可能你會問，如果件貨係假既，點解見唔到買家負評留言既？
嗱，方丈份人就好小氣既，你有冇見過前特首既FB有惡意留言？
再者，呢類廣告貼文其實係好"虛幻"既貼文，除非你咁啱係佢既受眾，否則喺FB呢片大海想搵呢個貼文，真係難過撈針！

---

呢個係啱啱講到賣黑卡數碼相機既FB專頁，冇任何資訊，冇任何商品，冇任何聯絡資料

---

好似呢個咁，雖然有300幾個回應，但全部回應都係停留喺問價階段，同埋都係同一個問題：玩開航拍機既應該都知道DJI Mavic系列，而佢哋都係賣Mavic wor，應該冇死？不過請留意，由頭到尾佢哋都冇提過佢哋係賣緊DJI既Mavic

---

香港01既報導完全揭示咗部分網店既黑暗面

---

總結：幫襯可信網店，勿貪小便宜

講咁多，無非都係想大家小心啲，唔好墮入呢類網購陷阱。
好多不法商家將產品包裝到好似正版正貨咁誤導消費者，再以市價1,2折做招徠，猶如行騙，而且中伏後往往追究無門。
所以建議大家透過以上4招，幫襯翻值得信任既網店。
所謂一粒老鼠屎 搞禍一鍋粥，作為開網店既我哋，同時都中意網購既我哋，希望大家都可以有更好既網購體驗！